Поранешниот директор на Царинската управа, Стефан Богоев, иронично ја коментираше одлуката на Основниот кривичен суд, кој на тројцата осомничени за бруталниот напад врз 14-годишно момче во скопската населба Ченто им определи мерки на претпазливост, наместо притвор.
„Јас пак си викам притвор ќе им дадат ама ништо. Од осмиот убод се брои изгледа…“, напиша Богоев на социјалните мрежи.
Неговата реакција следува откако Судот ги прифати мерките предложени од Обвинителството, според кои на осомничените им е забрането да го напуштаат живеалиштето, имаат обврска повремено да се јавуваат кај надлежен орган, привремено им се одземени патните исправи, не смеат да го посетуваат местото каде се случил нападот и им е забранет каков било контакт со оштетеното дете и неговите родители.
Од Основното јавно обвинителство соопштија дека истрагата продолжува, се прибира целокупната медицинска документација, се очекува медицинското вештачење, а паралелно се преземаат и други истражни дејствија.
Нападот врз 14-годишното момче се случи на 22 јуни, а Министерството за внатрешни работи поднесе кривична пријава 11 дена подоцна.
Богоев и самиот неодамна беше во фокусот на јавноста откако му беше определен 30-дневен притвор во предмет на Обвинителството за организиран криминал, но по жалба Кривичниот совет ја прифати гаранцијата од 55.000 евра и му го укина притворот, определувајќи му мерки на претпазливост.
