Поранешниот директор на Царинската управа, Стефан Богоев, денеска го напушти затворот „Скопје“ во Шутка, откако Кривичниот совет при Основниот кривичен суд Скопје ја прифати понудената гаранција и го укина притворот.
Богоев од затворот излезе носејќи три торби, а пред установата го пречека неговата сопруга.
Претходно, Кривичниот совет ја уважи жалбата на Богоев и прифати гаранција во износ од 55.000 евра во денарска противвредност, која е депонирана како обезбедување за неговото присуство во текот на постапката.
Покрај гаранцијата, Судот му определи и мерки на претпазливост – привремено одземање на патната исправа и забрана за преминување на државната граница.
Богоев беше во притвор по отворањето на истрагата за наводни злоупотреби во постапка за јавна набавка во Царинската управа. Основното јавно обвинителство за гонење организиран криминал и корупција го товари за кривични дела поврзани со јавни набавки и коруптивни дејствија.
Истрагата за случајот продолжува, а Богоев во натамошната постапка ќе се брани од слобода.
