Специјалната болница „Св. Еразмо“ во Охрид влегува во завршната фаза од долгогодишниот проект за изградба и опремување на новото крило. Планот е објектот да биде ставен во функција до Нова година, со што болницата ќе располага со четири современи операциони сали.
Министерот за здравство, Сашо Клековски, денеска информираше дека е затворена финансиската конструкција за завршување на проектот, чија вредност ќе надмине два милиони евра. Средствата ќе се обезбедат преку Фондот за здравствено осигурување, буџетот на болницата, други државни институции и донации од општествено одговорни компании.
За завршување на градежните работи веќе е избран добавувач, додека постапките за набавка на потребната опрема делумно се во тек, а за дел од опремата ќе бидат повторени.
Со реализацијата на проектот значително ќе се зголеми оперативниот капацитет на установата. Од сегашниот капацитет од околу една и пол операциона сала, „Св. Еразмо“ ќе добие вкупно четири современи операциони сали.
Клековски посочи дека болницата во последните две години бележи 40 отсто зголемување на бројот на интервенции на колкови и веќе е меѓу трите најзначајни здравствени установи во земјата за вакви зафати, заедно со Клиничкиот центар во Скопје и болницата „8 Септември“. Во „Св. Еразмо“ започнале и интервенции на колено, каде што, според министерот, постои простор за дополнително зголемување на бројот на зафати.
Директорот на болницата, Хари Шокаровски, оцени дека завршувањето на новото крило претставува уште еден значаен инвестициски циклус за реализација на долгогодишниот проект. Со новата опрема и подобрените услови, како што истакна, ќе се унапредат стандардите за работа и лекување на пациентите.
Шокаровски најави дека целта е „Св. Еразмо“ да се развие во референтен центар за ортопедија и неврохирургија, како и здравствена установа која ќе ги задоволува потребите на пациентите од Македонија и поширокиот регион.
