Бомба, два пиштоли и 240 куршуми кај скопјанец – најден и клуч од мотор поврзан со убиство, објави Обвинителството

Основното јавно обвинителство Скопје отвори истрага против 33-годишен скопјанец, откако при претрес во неговиот дом биле пронајдени бомба, два пиштоли, 240 куршуми, марихуана, како и клуч од мотор за кој постојат оперативни сознанија дека бил користен при извршување убиство.

— реклама —

Според Обвинителството, при претресот била запленета рачна бомба „М75“ со вградени метални кугли со дијаметар од околу два милиметри и шрапнелско дејство, чие поседување е забрането за граѓаните.

Пронајдени биле и вкупно 240 куршуми од различен калибар, пиштол „Црвена Застава“ калибар 7,65 милиметри со рамка со седум куршуми и пиштол „Берета“ со рамка во која имало шест куршуми.

— реклама —

Во домот полицијата открила и околу седум грама марихуана.

— реклама —

Посебно внимание во истрагата привлекол клучот од мотор пронајден во станот. Од Обвинителството наведуваат дека постојат оперативни сознанија оти моторот на кој му припаѓа клучот бил употребен при извршување кривично дело убиство. Во соопштението не се наведуваат дополнителни детали за кое убиство станува збор, ниту каква евентуална поврзаност има осомничениот со него.

Против 33-годишникот е поведена истражна постапка за неовластено изработување, држење, посредување и тргување со оружје или распрскувачки материи, како и за неовластено производство и пуштање во промет наркотични дроги, психотропни супстанции и прекурсори.

— реклама —

Јавниот обвинител побара од судот на осомничениот да му определи притвор, оценувајќи дека постои опасност од бегство и можност тој да продолжи со вршење кривични дела.