Министерот за локална самоуправа, Златко Перински, ќе ја напушти министерската функција и ќе биде назначен за директор во ФЗО, додека актуелниот директор на Фондот за здравствено осигурување, Сашо Клековски, ќе биде нов министер за здравство, дознава „Скопје1“ од повеќе извори.
Според сознанијата на редакцијата, досегашниот министер за политички систем и односи меѓу заедниците, Иван Стоиљковиќ, ќе го преземе Министерството за локална самоуправа, а актуелниот заменик-министер во Министерство за социјална политика, демографија и млади Ѓоко Велковски ќе биде нов министер за образование.
Истовремено, иако неговото име во изминатиот период често се споменуваше како можен дел од реконструкцијата, Борко Ристовски останува министер за спорт.
Вечерва од 20 часот Извршниот комитет на ВМРО-ДПМНЕ ќе ги финализира кадровските решенија, по што се очекува официјално да бидат соопштени промените во Владата.
Премиерот Христијан Мицкоски вчера изјави дека со коалициските партнери ВЛЕН и ЗНАМ е постигнат принципиелен договор околу распределбата на ресорите, но дека персоналните решенија ќе бидат објавени по завршувањето на седницата на Извршниот комитет.
„Ние не сме разговарале за персонални решенија, за имиња, принципиелно имаме договор околу ресорите. Додека не заврши седницата на Извршниот комитет на партијата, нема да коментирам ниту ресори, ниту имиња. Почекајте до околу 20 часот, јавноста ќе биде подетално запознаена“, рече Мицкоски.
Претходно, „Скопје1“ објави дека од Владата заминуваат Фатмир Лимани, Азир Алиу, Иван Стоиљковиќ, Зоран Љутков, Игор Филков, Цветан Трипуновски и Весна Јаневска.
Според информациите со кои располага „Скопје1“, по официјализирањето на министерските промени ќе следуваат и кадровски промени на директорските позиции, кои ќе бидат предмет на следната фаза од реконструкцијата на Владата.
