Најавената реконструкција на Владата нема да донесе суштински промени за граѓаните, туку претставува само замена на поединци без промена на политиките, изјави СДСМ преку соопштение.
Од опозициската партија во соопштението оценуваат дека по две години владеење, Владата предводена од премиерот Христијан Мицкоски не успеала да испорача резултати ниту на економски, ниту на социјален план.
„Замена на неколку имиња во Владата нема да донесе никаква промена за граѓаните, затоа што проблемот се политиките на оваа неспособна и криминална власт“, велат од СДСМ.
Според партијата, економијата се соочува со сериозни предизвици, буџетскиот дефицит е речиси целосно потрошен во првата половина од годината, јавниот долг е значително зголемен, а граѓаните не чувствуваат подобрување на животниот стандард.
Од СДСМ сметаат дека во, како што ја нарекуваат, „тендер-коалицијата“ нема суштински промени и дека реконструкцијата претставува само нова амбалажа за, според нив, истото неуспешно владеење.
„Старите политики остануваат, старите практики продолжуваат, а новите имиња се само нова амбалажа за истото старо, корумпирано владеење“, наведуваат од партијата.
Од СДСМ во соопштението додаваат дека со актуелните политики државата не напредува и побараа промени кои, според нив, ќе обезбедат подобра иднина за граѓаните.
