Брнабиќ најави: „Ќе го молиме Вучиќ да се кандидира за премиер“ пред можни вонредни избори во Србија

Претседателката на Народното собрание на Србија и функционерка на Српската напредна странка (СНС), Ана Брнабиќ, изјави дека во партијата ќе го „молат“ претседателот на Србија, Александар Вучиќ, да биде кандидат за претседател на владата на евентуални вонредни парламентарни избори.

— реклама —

Во настап за РТС, Брнабиќ најави и дека Вучиќ ќе повика на дијалог со сите политички групи во земјата, но истовремено изрази сомнеж дека многумина ќе се одзваат. Според неа, оние што најгласно зборуваат за дијалог, често се тие што го одбиваат.

— реклама —

Брнабиќ оцени дека најтешкиот разговор ќе биде внатре во самата СНС, бидејќи, како што рече, кај дел од членството расте незадоволството од, според неа, „двојните стандарди“ и „отвореното лицемерие“ што доаѓа од Брисел. Таа додаде дека, и покрај тоа што се смета за силно проевропски ориентирана, и кај неа „прелило“ од ваквите пораки, што, според неа, говори за расположението и меѓу останатите во партијата.

Како причина што сè уште не се распишани вонредни избори, Брнабиќ наведе глобална криза која, според нејзините проценки, може да донесе сериозни економски последици и недостиг од гориво и храна, меѓу другото и поради проблеми со вештачкото ѓубриво на светските пазари. Во тој контекст рече дека Србија е „подготвена“ подобро од многу европски држави.

— реклама —

Говорејќи за политичката динамика околу евентуални избори, Брнабиќ нагласи дека Вучиќ, според Уставот, не може повторно да се кандидира за претседател на државата, па затоа, според неа, дел од противниците повеќе би сакале сценарио со претседателски избори отколку парламентарни. Во тој контекст го спомена и ректорот на Универзитетот во Белград, Владaн Ѓокиќ, тврдејќи дека „бега“ од парламентарни избори.

Изјавите на Брнабиќ доаѓаат во период на зголемени шпекулации за можни вонредни парламентарни избори и отвораат дополнителни прашања за тоа како би изгледала распределбата на улогите во врвот на владејачката структура доколку дојде до ново излегување на гласање.