Брод потона во Црното Море, во близина на Бугарија, по напад со дрон, се трага по исчезнатиот екипаж

Трговски брод под знамето на Того потона во Црното Море, во близина на брегот на Бугарија, откако бил погоден во напад со дронови. По членовите на екипажот се трага, а засега нема информации колку лица се наоѓале на пловилото.

Во нападот биле погодени два брода, соопшти бугарскиот претседател Румен Радев. Екипажот на другиот брод, кој превезувал жито, бил спасен, но двајца членови се повредени. Товарот на бродот што потонал не е обелоденет.

— реклама —

Инцидентот се случил на околу 70 наутички милји од бугарскиот крајбрежен град Бјала и околу 140 наутички милји од украинскиот брег. Според извори од поморскиот транспортен сектор, можно е ова да е прв ваков напад во водите на бугарската ексклузивна економска зона.

Радев изјави дека во моментот на нападот не било утврдено дали дроновите дошле од Русија или од Украина. Тој нападот го оцени како грубо кршење на меѓународното право и предупреди дека продолжувањето на војната може дополнително да го прошири ризикот од конфликт.

— реклама —

Украинскиот претседател Володимир Зеленски, пак, во своето вечерно видеообраќање изјави дека истрагата спроведена во координација со бугарската морнарица покажала дека зад нападот стои Русија. Тој нагласи дека украинските одбранбени сили не спроведувале операции во тој дел од Црното Море и дека станувало збор за комбиниран руски напад со поморски и воздушни беспилотни летала.

Москва досега не го коментирала инцидентот.

Започната е потрага по исчезнатите членови на екипажот, а надлежните проверуваат и дали нападот предизвикал каква било опасност за животната средина.

— реклама —

Извор од областа на поморската безбедност за Ројтерс изјавил дека првичните проценки укажуваат оти најверојатно станува збор за руски напад.

Нападот го осуди и бугарскиот претседател, кој порача дека напаѓањето цивилни пловни објекти е неприфатливо. Претседателката на Европската комисија, Урсула фон дер Лајен, исто така, го осуди инцидентот, посочувајќи дека трговските бродови и нивните екипажи се изложени на напади.

— реклама —

Во меѓувреме, руските воздушни напади продолжија и во Украина. Во Киев загинале две лица откако воздушен напад предизвикал пожар во гаражен комплекс, соопшти градоначалникот Виталиј Кличко. Оштетени биле и градски објекти и магацини.

Одделни воздушни напади во Днипро оштетиле индустриски објект, додека во Запорожје била оштетена транспортната инфраструктура, а во Кременчук станбени згради, соопштија регионалните власти.