Три поморски дрона погодиле контејнерски брод во Црното Море, екипажот се евакуирал

Контејнерски брод под либериско знаме бил погоден од три поморски дрона во Црното Море, на околу 40 километри од Шабла, на североисточниот брег на Бугарија. Нападот го потврди бугарскиот министер за одбрана Димитар Стојанов во текот на трилатералната средба со неговите колеги од Турција и Романија, посветена на регионалната безбедност.

— реклама —

Според порталот „Maritime.bg“, нападнат е бродот „Contship Jet“, кој испловил од Хаифа, Израел, кон романското пристаниште Констанца. На пловилото му бил испратен брод за помош, додека членовите на екипажот се евакуирале во чамци за спасување. Засега нема информации за нивната состојба ниту за обемот на штетата.

— реклама —

„Додека траеше состанокот, контејнерски брод беше погоден од три поморски дрона во крајбрежниот појас, на околу 21 наутичка милја од Шабла“, изјави Стојанов.

Бугарија, Романија и Турција усвоија заедничка изјава со која ги осудуваат нападите врз цивилниот поморски сообраќај. Стојанов предупреди дека ваквите инциденти претставуваат опасна ескалација и сериозно ја загрозуваат безбедноста на пловидбата.

— реклама —

Трите земји повикаа на итен прекин на нападите врз трговските бродови и поморската инфраструктура. Тие, исто така, се договорија да воспостават трилатерален механизам за координација во Црното Море, кој ќе опфаќа редовни консултации, размена на информации и дополнителни мерки за зајакнување на регионалната безбедност.

Инцидентот се случува по серијата напади со воздушни и поморски дронови врз трговски бродови во близина на бреговите на Бугарија и Романија во текот на октомври. Поради зачестените напади, сè почесто се предупредува дека безбедноста на пловидбата во Црното Море е сериозно загрозена.