(Видео) Драма кај Бугарија: Три поморски дрона погодија товарен брод во Црното Море

Осумнаесет членови на екипажот на контејнерскиот брод „Контшип Џет“ биле спасени откако бродот бил погоден од три поморски дрона во Црното Море, на околу 16 наутички милји од бугарскиот брег.

— реклама —

Според информациите што ги пренесе „Новините“, повеќе од 20 контејнери со опасни материи паднале во морето. Бугарските власти соопштија дека бродот претрпел три пробивања на трупот, но сè уште плови, иако е значително навален. Засега не е утврдено од каде потекнуваат дроновите.

— реклама —

Меѓу контејнерите што пловат во морето има литиум-јонски батерии, киселини, запаливи течности и други опасни материи. Поради ризикот за поморскиот сообраќај, властите ги предупредија морепловците да бидат особено внимателни.

Првичната проверка на морето во близина на ртот Калијакра не открила видливи знаци на загадување. Сепак, ќе бидат земени примероци од водата за лабораториски анализи.

— реклама —

Во одделен инцидент, на брегот кај Царево биле пронајдени остатоци за кои се верува дека се од рускиот дрон „Геран“. Бугарското Министерство за одбрана соопшти дека остатоците биле собрани и пренесени во поморска база.