Зголемен е бројот на пациенти со гастроинтестинални тегоби во Скопје, но нивниот број е во рамките на очекуваното за овој период од годината и не се поврзува со водата за пиење, изјави директорот на Клиниката за инфективни болести, д-р Фадил Цана.
Според него, бројот на пациенти е зголемен во однос на периодите со пониски температури, но тоа не претставува отстапување од вообичаените бројки забележани во претходните години.
„Тоа што можам да го кажам како директор на Инфективната клиника е дека немаме такви податоци дека причина за некое гастроинтестинално нарушување се пациентите пријавени поради водата. Засега има нормално зголемен број, со оглед на горештините. Бројот е зголемен, но не е над нормалата во споредба со претходните години“, изјави Цана.
Тој нагласи дека на Клиниката нема податоци за пациенти кај кои гастроинтестиналните тегоби се поврзани со пиењето вода од скопскиот водоснабдителен систем.
Во јавноста во изминатиот период се појавија информации за наводна контаминација на скопската вода со ешерихија коли, што предизвика загриженост кај граѓаните.
На овие тврдења се осврна и специјалистот по интерна медицина и клиничка токсикологија, Нико Беќаровски, кој рече дека добил голем број повици од граѓани загрижени поради информациите за наводната бактерија во водоснабдителниот систем.
Беќаровски посочи дека не верува оти шпекулациите се точни, но побара надлежните институции јавно да ги презентираат резултатите од анализите. Тој додаде дека и самиот ја користи водата од чешма без страв.
Од Град Скопје ги отфрлија тврдењата дека во водата што го снабдува градот е пронајдена ешерихија коли.
Во меѓувреме, ЈП „Водовод и канализација – Скопје“ соопшти дека биле земени 42 примероци од водоводната мрежа, од кои четири од бунарскиот потег Нерези-Лепенец. Примероците биле испитани со физичко-хемиски и микробиолошки анализи во акредитирани лаборатории.
Од претпријатието наведуваат дека резултатите покажале дека водата од скопскиот водоснабдителен систем е соодветна за пиење.
