Бројот на случаи на зараза со хантавирус поврзани со крузерот „МВ Хондиус“ се искачи на 13, соопшти денеска генералниот директор на Светската здравствена организација, Тедрос Аданом Гебрејесус.
„Шпанија пријави нов случај на зараза меѓу патниците кои се наоѓаат во карантин, со што вкупниот број случаи достигна 13“, напиша Гебрејесус на социјалната мрежа Икс.
Според информациите, меѓу заразените има и три лица кои починале, но од 2 мај наваму не се регистрирани нови смртни случаи.
„Ситуацијата останува стабилна. Патниците кои се разболеле ја добиваат потребната медицинска грижа, додека останатите остануваат во карантин“, додаде првиот човек на СЗО.
Во последните две недели сите преостанати патници, членови на екипажот и медицинскиот персонал го напуштиле луксузниот брод на кој избила епидемијата.
Хантавирусите се вируси што ги пренесуваат глодари и можат да предизвикаат сериозни заболувања кај луѓето. Според проценките на СЗО, во светот годишно се регистрираат меѓу 10.000 и 100.000 случаи, а тежината на болеста зависи од видот на вирусот.
