Брвеница ќе избира градоначалник во втор круг, еве како се сменија резултатите

Предвремените локални избори во Брвеница донесоа промени во однос на минатогодишното гласање, особено кај резултатите на ДУИ, која речиси двојно ја зголеми поддршката. Во вториот круг, закажан за две недели, за градоначалничката функција ќе се борат Стојанчо Радически од ВМРО-ДПМНЕ и Аркин Јахиј од ДУИ.

Двете партии им се заблагодарија на гласачите и најавија победа во вториот круг, а според споредбата со изборите во 2025 година, промените се забележуваат и кај одѕивот и кај бројот на гласови за кандидатите.

— реклама —

На вчерашното гласање излегле 7.565 гласачи, наспроти 7.288 на минатогодишните локални избори. Намален е и бројот на неважечки ливчиња — од 251 во 2025 година на 160 сега.

— реклама —

ДУИ освои 2.152 гласа, речиси двојно повеќе од 1.147 гласови што ги доби нејзиниот кандидат минатата година. Со овој резултат, Аркин Јахиј обезбеди пласман во вториот круг.

Кандидатот на ВМРО-ДПМНЕ, Стојанчо Радически, освои 2.943 гласа. За споредба, Јовица Илиевски, кој во 2025 година беше избран за градоначалник, освои 3.388 гласа.

— реклама —

Кандидатот на ВЛЕН, Јакуп Хисеини, заврши на третото место со 1.528 гласа. На претходните избори кандидатот на оваа партија, Хаќим Рамадани, освои 2.021 глас и се бореше за градоначалничкото место со Илиевски.

Кандидатот на СДСМ, Јовица Радевски, освои 706 гласа и заврши на четвртото место. Тоа е повеќе од резултатот на кандидатката на партијата на минатогодишните избори, Светлана Митреска – Анџелковска, која освои 481 глас.

Предвремените избори во Брвеница беа распишани по ненадејната смрт на градоначалникот Јовица Илиевски.