(Фото) Со авиони доаѓале на гласање во Брвеница, Јахији ѝ се заблагодари на дијаспората

Албанската дијаспора активно се вклучила во предвремените локални избори во Брвеница, а според фотографии објавени на социјалните мрежи, дел од гласачите со авиони пристигнувале во Македонија за да го остварат своето право на глас.

Новоизбраниот градоначалник на Брвеница, Аркин Јахији, по објавувањето на резултатите упати посебна благодарност до иселениците кои, како што рече, придонеле за неговата победа.

— реклама —

Неколку дена пред изборите на Фејсбук-страницата „Shoqata për f. Çellopek – Zvicër“ беше објавен повик до албанската дијаспора да се мобилизира и да гласа, со порака дека треба самата да ја одреди својата судбина. Во повикот беше истакнато дека состојбата во општината ги надминува политичките поделби и дека е потребно единство и масовно излегување на гласање.

— реклама —

По изборите, на истата страница беа објавени фотографии од полни авиони, со порака дека патувањето до родното место не претставува замор кога станува збор за љубовта кон него. Во објавата им беше честитано на жителите на општината за, како што беше наведено, покажаното единство и граѓанска одговорност.

„Ѝ благодарам на нашата драга дијаспора, која не штедеше ништо. Бог нека ве награди. Ние ќе бидеме вашиот глас во татковината. Денес излеговме со кренати глави. Немам зборови да ја опишам оваа емоција“, изјави Јахији.

— реклама —

Кандидатот на Националната алијанса за интеграција, предводена од ДУИ, освои 4.442 гласа, додека кандидатот на ВМРО-ДПМНЕ доби 4.177 гласа, според објавените податоци на Државната изборна комисија.

— реклама —