БСЖ вакцинацијата привремено одложена во Македонија по четири случаи на ретко воспаление на коските во Хрватска, се проверуваат сериите и квалитетот

БСЖ вакцинацијата во Македонија привремено се одложува, додека се очекуваат дополнителни информации за сериите на вакцините, нивниот квалитет и можната поврзаност со пријавените несакани реакции.

— реклама —

Одлуката ја донела Комисијата за имунизација при Министерството за здравство, откако во Хрватска беа објавени информации за несакани реакции поврзани со БСЖ вакцината. Министерството веднаш ја контактирало Агенцијата за лекови и медицински средства (МАЛМЕД) и побарало податоци за сериите што се користат во Македонија, со оглед на тоа што станува збор за вакцина од ист производител.

Од Министерството потсетуваат дека БСЖ вакцинацијата во Македонија е задолжителна, бидејќи земјата се смета за подрачје со висок ризик од туберкулоза.

— реклама —

Според податоците на Министерството, на Институтот за ТБЦ во моментов се лекуваат 95 пациенти со туберкулоза, од кои 83 се случаи регистрирани годинава. Во Детската болница „Козле“, пак, во 2025 година биле евидентирани 15 случаи, а во 2026 година досега се регистрирани 12 нови случаи.

— реклама —

„Комисијата за имунизација донесе заклучок за времено одложување на имунизацијата со оваа вакцина до добивање комплетни информации во однос на сериите, нивниот квалитет и асоцираноста со појавата на несакани реакции“, соопшти Министерството за здравство.

Оттаму додаваат дека во изминатите десет години до МАЛМЕД била доставена само една пријава за сомнеж за несакана реакција од БСЖ вакцината. Пријавата, поднесена во август 2022 година, се однесувала на појава на апсцес на местото на апликација на вакцината.

Од Министерството посочуваат дека ваквата реакција е опишана и во упатството за употреба на вакцината.