Бугарија бара апсење на двајца Германци осомничени за палење антени на „Старлинк“

Бугарските власти издале меѓународна потерница по двајца германски државјани осомничени дека запалиле антени на сателитскиот интернет-систем „Старлинк“ во близина на главниот град Софија, пишува Асошиејтед прес.

— реклама —

Судот во Софија го одобрил европскиот налог за апсење откако обвинителството соопштило дека осомничените го извеле планираниот напад во рок од само неколку часа, додека престојувале во Бугарија на 9 октомври. Тие се идентификувани како Тирпан Бејтула и Зека Ислам, а обвиненијата против нив се поднесени во нивно отсуство.

Според обвинението, три антени биле целосно уништени, две биле делумно оштетени, а пламенот предизвикал последици и врз уште три антени.

— реклама —

Осомничените наводно влегле во Бугарија со автомобил со германски регистарски таблички преку граничниот премин Калотина, а неколку часа подоцна ја напуштиле земјата преку истиот премин.

— реклама —

Одлуката на судот може да биде обжалена. Доколку бидат осудени, на двајцата мажи им се заканува затворска казна од три до 12 години.

Слични напади со палење антени, при што биле приведени осомничени лица, неодамна биле регистрирани и во Полска и Литванија. Властите во тие земји ја поврзале саботажата со Русија.

Украина ги користи антените на „Старлинк“ за воени комуникации.