Бугарија порача дека е отворена за дијалог откако Муцунски побара посредување од ЕУ во разговорите

Бугарија изразува подготвеност за конструктивен дијалог со Македонија и оценува дека прашањето за нејзиното пристапување кон Европската Унија треба да се разгледува во рамките на европските институции.

— реклама —

Ова е наведено во ставот на бугарското Министерство за надворешни работи, објавен по изјавите на министерот за надворешни работи Тимчо Муцунски дека Македонија сака во идните разговори со Софија да биде вклучен и претставник на Европската Унија.

— реклама —

Од бугарското Министерство посочуваат дека ја поддржуваат работата на Европската комисија во процесот на преговори со земјите кандидатки, притоа нагласувајќи дека добрососедските односи се еден од основните услови за напредокот во европската интеграција.

Во ставот се наведува и очекување Македонија да ги исполни преземените обврски, додека Бугарија повторно ја нагласува својата поддршка за европскиот пристапен процес.

— реклама —

Муцунски, во интервју од Њујорк, оцени дека меѓу Скопје и Софија постои сериозен недостаток на доверба. Тој посочи дека за време на Генералното собрание на Обединетите нации немало работни разговори меѓу македонските и бугарските делегации.

Според Муцунски, за Македонија е важно во идните разговори со Бугарија да има и учество на Европската Унија. Тој појасни дека не е од суштинско значење дали станува збор за европски институции или за одделни земји членки, туку дека е потребно присуство на дополнителен фактор кој би помогнал во градењето доверба меѓу двете страни.