Цената на нафтата повторно над 100 долари за барел, расте загриженоста на пазарите

Глобалните цени на нафтата повторно ја надминаа границата од 100 долари за барел, откако ескалацијата на конфликтите на Блискиот Исток предизвика нова загриженост за снабдувањето на светските пазари.

— реклама —

Цената на суровата нафта од типот Брент во четвртокот се искачи над 100 долари за барел, првпат откако во март достигна слично ниво.

Во исто време, американската сурова нафта втор ден по ред бележи раст и поскапе за повеќе од пет проценти, достигнувајќи речиси 92 долари за барел, што е највисоко ниво од 11 јуни.

— реклама —

Според „Гардијан“, цената на Брент достигна 126 долари за барел во април, а потоа постепено се намали и кон крајот на мај падна под 100 долари. На почетокот на јули се спушти и до 71 долар за барел, поттикната од надежите за прекин на огнот во регионот.

— реклама —

Сепак, цените повторно почнаа да растат по пропаѓањето на меморандумот за разбирање меѓу САД и Иран и обновената ескалација на конфликтот.

Дополнителен притисок врз пазарите создадоа јеменските Хути, поддржани од Иран, кои презедоа одговорност за нападите врз два саудиски танкери во Црвеното Море, откако прогласија поморска блокада на Саудиска Арабија.

— реклама —

Пазарите се особено чувствителни на случувањата во областа на Баб ел Мандеб, бидејќи низ овој морски премин секојдневно минуваат милиони барели нафта на пат кон светските пазари. Се проценува дека низ овој стратешки воден пат годишно се одвива меѓу 12 и 15 проценти од глобалната поморска трговија, чија вредност надминува еден трилион долари.