Цената на струјата барем да ја задржиме иста, а зошто да не и се обидеме да ја поевтиниме, рече Мицкоски

Цената на електричната енергија за домаќинствата би можела да остане на сегашното ниво, а во најдобар случај и да се намали, најави премиерот Христијан Мицкоски при посетата на Штип.

— реклама —

Одговарајќи на новинарско прашање, Мицкоски рече дека се подготвува нова методологија со која ќе се настојува да се задржи актуелната цена на електричната енергија, но и да се создадат услови за нејзино поевтинување.

— реклама —

„За струјата правиме методологија да се обидеме, ако ништо друго, барем да ја задржиме истата цена, а зошто да не и се обидеме да ја поевтиниме“, изјави Мицкоски.

Премиерот посочи дека откако е на власт актуелната Влада нема зголемување на цената на електричната енергија за домаќинствата. Тој оцени и дека состојбата во енергетскиот сектор е стабилна и дека се очекува стабилна зима, и покрај предизвиците на меѓународниот пазар.

— реклама —

Мицкоски како еден од предизвиците ја посочи енергетската криза поврзана со војната на Блискиот Исток.

— реклама —

„И покрај тоа што сме во пикот на најголемата енергетска криза која човештвото ја памети, а тоа е војната во Арапскиот Залив, и покрај сите тие предизвици, денеска ако ме прашате, јас можам да кажам дека состојбата е стабилна, ќе имаме стабилна зима“, оцени премиерот.