Цената на суровата нафта надмина 100 долари за барел

Цената на суровата нафта денеска повторно ја надмина границата од 100 долари за барел, поттикната од стравувањата за можни нарушувања на испораките преку Ормускиот Теснец и теснецот Баб ел-Мандеб, како и од новите тензии на Блискиот Исток.

Меѓународниот репер „Брент“ во попладневното тргување достигна цена од 100,17 долари за барел, што претставува раст од околу 6,5 проценти во однос на претходното затворање. Во исто време, американската сурова нафта WTI се тргуваше по цена од 91,54 долари за барел, што е зголемување од 5,46 проценти.

— реклама —

Растот на цените следува по предупредувањата од Вашингтон и Техеран, како и по информациите за напади врз саудиски нафтени танкери и експлозија на брод во Ормускиот Теснец.

— реклама —

Американскиот претседател Доналд Трамп изјави дека Соединетите Американски Држави ќе го сметаат Иран за одговорен доколку јеменското движење Хути повторно нападне трговски бродови. Тој најави и, како што наведе, „голема воена казна“ и за Иран и за Хутите доколку дојде до нови напади.

Во меѓувреме, Хутите соопштија дека извеле воена операција против два саудиски нафтени танкери, користејќи балистички и крстосувачки ракети и беспилотни летала.

— реклама —

Американскиот државен секретар Марко Рубио ги повика Хутите да не се вмешуваат во конфликтот со Иран, додека иранската армија предупреди дека би можела да нападне енергетски објекти низ регионот доколку продолжат американските напади врз иранската инфраструктура.

— реклама —

Иранската Револуционерна гарда, пак, соопшти дека извршила напади врз американски воени бази во Кувајт и Јордан, а истовремено наведе дека танкер бил погоден од експлозија во Ормускиот Теснец. Според нивните тврдења, уште два брода се откажале од пловидба низ јужниот поморски коридор.

Новите случувања дополнително ги засилија стравувањата за безбедноста на Ормускиот Теснец, преку кој се транспортира околу една петтина од светската потрошувачка на нафта, што дополнително ги поттикна цените на светските пазари.