Цените на гасот во Европа нагло паднаа по договорот меѓу САД и Иран

Цените на природниот гас во Европа значително се намалија откако САД и Иран постигнаа согласност за текстот на меморандумот за разбирање, кој треба да стави крај на војната и да овозможи повторно отворање на Ормускиот Теснец.

— реклама —

На холандската дигитална берза TTF, мегават-час гас за испорака во јули попладнево се тргуваше по цена од 43,55 евра, што претставува пад од 7,4 проценти во однос на крајот на минатата недела. Тоа е и најниската цена на гасот од почетокот на мај.

— реклама —

Пазарите позитивно реагираа на најавата дека американско-иранскиот меморандум за прекин на конфликтот на Блискиот Исток би можел да биде потпишан во петок. Пред избувнувањето на војната, низ Ормускиот Теснец минуваа околу 20 проценти од светската нафта и течен природен гас.

Според иранската новинска агенција „Тасним“, преговорите за конечниот текст на меморандумот завршиле непосредно пред неговото објавување. Извор близок до разговорите навел дека Вашингтон и Техеран имале несогласувања околу одредбите поврзани со Ормускиот Теснец, поради што во последен момент биле направени измени во документот.

— реклама —

Како дел од договореното, Иран и Оман ќе обезбедуваат услуги за поморска навигација во теснецот, а воведен е и 60-дневен мораториум за наплата на надоместоци за бродовите што ќе минуваат низ овој стратешки важен воден пат.

По истекот на овој период, според истиот извор, Иран планира да започне со наплата на одредени услуги за бродовите што транзитираат низ Ормускиот Теснец.