Центар поставува 20 контејнери за текстилен отпад пред училишта и градинки

Општина Центар започна со поставување специјализирани контејнери за селектирање текстилен отпад пред основните училишта и детските градинки, во соработка со лиценцираната компанија „Еко-текс груп“. Предвидено е да бидат поставени вкупно 20 контејнери на различни локации во општината.

— реклама —

Првиот контејнер е поставен пред Основното општинско училиште „Коле Неделковски“. Градоначалникот Горан Герасимовски посочи дека целта на иницијативата е да се поттикнат еколошките навики и одговорноста кај најмладите, но и кај останатите жители.

— реклама —

Во првата фаза ќе бидат поставени 11 контејнери, додека во втората ќе бидат поставени уште девет, со што ќе се воспостави мрежа од вкупно 20 места за одлагање текстилен отпад.

Граѓаните ќе можат да оставаат стара облека, обувки и други текстилни производи, кои наместо да завршат во комуналниот отпад, ќе бидат одделно собрани, сортирани и упатени на понатамошна обработка и рециклирање.

— реклама —

Герасимовски истакна дека преку ваквите активности децата уште од најрана возраст се запознаваат со значењето на селекцијата, рециклирањето и повторната употреба на материјалите, со што се придонесува за почиста и поздрава животна средина.

— реклама —

Од Општина Центар посочуваат дека иницијативата е дел од заложбите за одговорно управување со отпадот и спроведување практики за заштита на животната средина.