Квалитетот на водата во Гостивар постепено се подобрува, но таа сè уште не е исправна за пиење, информира директорот на Дирекцијата за заштита и спасување, Стојанче Ангелов.
Според него, надлежните институции активно работат на надминување на проблемот и се координираат околу мерките што треба да се преземат за целосно подобрување на состојбата.
Дел од експертите вклучени во процесот на прочистување на водоводната мрежа очекуваат проблемот да биде надминат. Сепак, тие укажуваат дека понатамошното одржување на квалитетот на водата ќе зависи од локалните институции и од преземањето соодветни мерки за да не се повтори состојбата.
Од Центарот за јавно здравје во Гостивар за Телевизија 24 информирале дека состојбата континуирано се следи и дека институцијата е во координација со Кризниот штаб.
Во меѓувреме, состојбата со водата предизвика и нови политички реакции, при што партиите продолжија со меѓусебни обвинувања околу проблемот и начинот на кој надлежните институции се справуваат со него.
Проблемите со водоснабдувањето во Гостивар траат подолг период. Дел од граѓаните и претходно се соочувале со недостиг на вода во домовите, а во јавноста беа отворени и прашања поврзани со недостигот од инфектолози во гостиварската болница.
Во меѓувреме, државниот правобранител побара граѓаните да бидат ослободени од плаќање на сметките за вода сè додека проблемот со водоснабдувањето не биде надминат.
