Четири потврдени случаи на морбили во Македонија

Во Македонија се потврдени четири случаи на морбили, од кои три се кај македонски државјани од Велес, Штип и Скопје, а едно заболено лице е странски државјанин. Меѓу домашните случаи има две бебиња помлади од 12 месеци и едно лице на возраст над 40 години. Сите тројца македонски државјани се невакцинирани, информираше министерот за здравство Сашо Клековски.

— реклама —

Надлежните институции ги испитуваат можните епидемиолошки врски меѓу случаите. Според Клековски, засега нема услови за прогласување епидемија, но поради појавата на заразата во соседно Косово и Бугарија, граѓаните и институциите треба да бидат особено внимателни.

Министерот апелираше граѓаните да проверат дали примиле две дози од вакцината или прележале морбили, со посебен акцент на здравствените работници. Родителите се повикани да не ги носат децата во градинка ако имаат температура, црвенило на очите или осип.

— реклама —

Клековски предупреди дека вирусот е високо заразен и може да остане активен во воздухот околу два часа. Затоа, лицата со симптоми не треба да одат во лекарски чекални, туку телефонски да контактираат со својот лекар, за да се спречи ширење на заразата.

— реклама —

Институтот за јавно здравје подготвил протоколи за здравствените установи, а упатства се доставени и до градинките и училиштата. Издадени се и протоколи за граничните премини, особено поради епидемиите во Косово и Бугарија.

Едно од заболените бебиња било хоспитализирано на Клиниката за инфективни болести, но веќе е отпуштено на домашно лекување и е во добра состојба. Клиниката за детски болести се подготвува за прием на евентуални нови случаи кај најмалите пациенти.

— реклама —

Во моментов се достапни 14.000 вакцини, а Министерството има можност да обезбеди и дополнителни количества. Комисијата за заразни болести веќе заседава и ги разгледува следните мерки за спречување на ширењето на морбилите.