Опасност од нова епидемија на морбили, Клековски алармира: Само 62% од децата се вакцинирани

Нискиот опфат со МРП вакцината и зголемениот број случаи на морбили во Косово и Бугарија создаваат причина за загриженост и во Македонија. Министерот за здравство, Сашо Клековски, денеска апелираше родителите навреме да ги вакцинираат децата, предупредувајќи дека опфатот од само 62 проценти е далеку под потребните 95 проценти за соодветна заштита од ширење на болеста.

— реклама —

„Имаме причини веќе да почнеме со алармирање. Ќе се обидеме во наредните денови и недели преку повеќе активности да ги мотивираме граѓаните да ги вакцинираат децата од морбили, односно да го зголемиме опфатот за да превенираме можна епидемија“, изјави Клековски.

— реклама —

Според Институтот за јавно здравје, во 2025 година ниту една вакцина од редовниот календар не го достигнала препорачаниот опфат од 95 проценти. Кај вакцината против хепатитис Б опфатот е 77 проценти, кај хемофилус инфлуенца 78 проценти, а кај дифтерија, тетанус и пертусис 79 проценти. Вакцината против полиомиелитис има опфат од 79 проценти.

Особено загрижувачки е опфатот со МРП вакцината, кој изнесува 62 проценти. Кај ХПВ вакцината опфатот е 51 процент, додека кај вакцините против ротавирус и пневмокок е 64, односно 80 проценти.

— реклама —

Највисок опфат со МРП вакцината е забележан во 2019 година, кога во земјава имаше епидемија на морбили. Тогаш првата доза ја примиле 93,1 процент од децата, а втората 93,4 проценти.

— реклама —

Здравствените власти сега предупредуваат дека појавата на нови случаи во соседството и нискиот домашен опфат со вакцинација може да создадат услови за повторно ширење на морбилите.