Морбилите можат да предизвикаат сериозни компликации – кои се симптомите и како да се заштитите?

Во Македонија се регистрирани пет лабораториски потврдени случаи на морбили, а здравствените власти предупредуваат дека ризикот од појава на нови случаи е зголемен. Сепак, засега нема индикации за пошироко ширење на болеста на национално ниво.

Според Министерството за здравство, сите пет заболени лица се невакцинирани, а меѓу нив има и две бебиња кои поради возраста сè уште не можат да ја примат вакцината.

— реклама —

Морбилите, познати и како мали сипаници, се исклучително заразно вирусно заболување кое може да предизвика сериозни компликации, особено кај децата помали од пет години, возрасните над 30 години и бремените жени.

Првите симптоми најчесто се појавуваат од 7 до 14 дена по изложувањето на вирусот и вклучуваат висока температура, течење на носот, кашлица, црвени и насолзени очи, како и мали бели точки во внатрешноста на образите. Неколку дена подоцна се појавува осип, најпрво на лицето и вратот, кој постепено се шири по телото.

— реклама —

Болеста може да предизвика воспаление на мозокот, пневмонија, инфекции на ушите, дијареја, дехидратација, па дури и слепило. Кај бремените жени постои ризик од спонтан абортус или предвремено породување.

— реклама —

Вирусот се пренесува преку кашлање, кивање и воздухот, а може да остане присутен во воздухот или на површини до два часа. Заразена личност може да го пренесе и пред да се појават симптомите.

Не постои специфичен лек за морбили, па лекувањето е насочено кон ублажување на симптомите и спречување компликации. Во одредени случаи, доколку се појават дополнителни бактериски инфекции, може да биде потребна терапија со антибиотици.

— реклама —

Најсигурната заштита е вакцинацијата со МРП-вакцината, која штити од морбили, рубеола и заушки. Првата доза се прима на возраст од 12 месеци, а втората при започнување на основното образование.

Здравствените власти потсетуваат дека невакцинираните лица се изложени на ризик од заразување и апелираат родителите да се консултираат со матичните лекари за навремена имунизација.