Нема да има присилни мерки за вакцинација против морбили, Клековски смета дека тоа може да даде спротивен ефект

Присилна вакцинација против морбили нема да се спроведува, бидејќи таквиот пристап може да даде спротивен ефект, изјави министерот за здравство Сашо Клековски. Тој ги повика родителите да ги вакцинираат децата со МРП-вакцината, особено во услови кога во Македонија се регистрирани пет случаи на морбили, од кои три кај бебиња.

— реклама —

„Нема да правиме акција со присилни мерки за да се вакцинираат децата со МРП-вакцината, бидејќи во минатото се покажа дека присилните мерки во одредена мера се контрапродуктивни“, изјави Клековски.

— реклама —

Најновиот случај беше потврден во вторникот кај едноиполгодишно дете. Досега заболеле три бебиња, еден 45-годишен маж и едно лице од Косово. Опфатот со вакцинација против морбили во земјава изнесува 62 отсто.

Во врска со законската обврска за вакцинација и забраната за прием во градинки на невакцинирани деца, министерот посочи дека оваа мерка и во минатото се заобиколувала.

— реклама —

Клековски апелираше лицата кои имаат симптоми да не одат директно во здравствените установи, туку најпрво телефонски да контактираат со својот лекар, со цел да се намали можноста за ширење на вирусот во чекалните.

— реклама —

Тој информираше дека во моментов нема хоспитализирани пациенти, но веќе се дадени насоки за подготовка на една клиничка болница за прием на бебиња, како најранлива група. За возрасните пациенти соодветна установа е Клиниката за инфективни болести.