30 деца со висока температура прегледани во една ноќ, најголем дел невакцинирани со МРП-вакцината

Загриженоста кај здравствените работници во Македонија расте по потврдените случаи на морбили, особено поради зголемениот број деца со висока температура кои бараат лекарска помош, а не се вакцинирани со МРП-вакцината.

— реклама —

Во текот на ноќта, во дежурниот пункт на Поликлиниката „Бит Пазар“ биле прегледани околу 30 деца со покачена температура, од кои најголем дел биле невакцинирани и посетувале градинка.

Докторката Каролина Ристова Стефанова предупредува дека состојбата е загрижувачка, бидејќи родителите постојано ја одложуваат вакцинацијата. Според неа, сите деца што ги прегледала за време на дежурството имале висока температура, а ниту едно не било вакцинирано.

— реклама —

Лекарите потсетуваат дека симптомите на морбили вклучуваат висока температура, поспаност, воспалено грло, црвенило на очите, течење на носот и карактеристичен осип. Бидејќи станува збор за исклучително заразно заболување, вирусот може да остане во воздухот и до два часа откако заразеното лице ќе ја напушти просторијата.

— реклама —

Поради ризикот од ширење на инфекцијата, родителите кај чии деца постои сомнеж за морбили треба најпрво телефонски да го контактираат матичниот лекар, наместо директно да одат во здравствена установа.

Здравствените власти препорачуваат проверка на вакциналните картони во училиштата и градинките и навремена вакцинација на децата кои не ја примиле МРП-вакцината. Воедно, се разгледува и можноста за определување посебна здравствена установа за хоспитализација на заболените деца.

— реклама —

Во последните два до три дена е забележан зголемен интерес за вакцинација, особено кај учениците кои треба да ја примат втората доза. Лекарите потсетуваат и на епидемијата од 2019 година, кога биле заразени околу 2.000 деца, а биле регистрирани четири смртни случаи.