Само 62 отсто од населението е вакцинирано против морбили – ИЈЗ предупредува на нова епидемија

Нискиот опфат со вакцинација против морбили и зголемениот број заболени во регионот создаваат ризик од нова епидемија во Македонија, предупредува директорката на Институтот за јавно здравје (ИЈЗ), Марија Андоновска. Во земјава досега се регистрирани пет случаи на мали сипаници, а само 62 отсто од населението е опфатено со вакцинација.

Андоновска предупредува дека ваквиот процент не обезбедува доволна заштита од ширење на вирусот, кој е меѓу најзаразните вирусни заболувања. Дополнителна загриженост предизвикува фактот што во повеќе земји од регионот се регистрирани стотици случаи.

— реклама —

Најновиот случај во Македонија е потврден кај дете на возраст од една и пол година, информираше министерот за здравство Сашо Клековски. Меѓу петте заболени има три мали деца и еден 45-годишен маж, сите македонски државјани, како и едно лице од Косово.

— реклама —

„Во моментов опфатот со вакцинација изнесува 62 отсто. Постои опасност повторно да имаме епидемија. На овој ризик предупредувавме уште летоска, и како Институт за јавно здравје и како Министерство за здравство“, изјави Андоновска.

Таа посочи дека морбилите се пренесуваат исклучително лесно, а за заразување може да биде доволна и кратка изложеност на вирусот во затворен простор. Според неа, едно заболено лице во ходник или чекална може да ги изложи на ризик и останатите присутни.

— реклама —

Како еден од факторите што ја намалуваат довербата во вакцинацијата, директорката ги посочи дезинформациите и неаргументираните тврдења што се шират на социјалните мрежи. Таа апелираше граѓаните да се информираат од проверени извори и да се водат од медицински докази.

— реклама —

Андоновска потсети и на епидемијата што започна во 2018 и продолжи во 2019 година. Тогаш опфатот со вакцинација изнесувал 74,8 отсто, но биле хоспитализирани 800 лица, а четири ја загубиле битката со болеста.

Таа предупреди дека невакцинираните лица се изложени на поголем ризик од потешка клиничка слика и компликации доколку се заразат со морбили.