Обична цигара на плажа во Будва се претвори во причина за жестока расправија меѓу две туристки, а приказната предизвика бројни реакции на социјалните мрежи.
Според сведоштвото на една од нив, таа седела на својот пешкир под чадор за сонце и запалила цигара кога жена, која била сместена зад неа, почнала да се жали дека чадот ѝ пречи и упатила навредливи зборови.
Туристката тврди дека не сакала да ја продлабочува расправијата и останала смирена, посочувајќи дека на тој дел од плажата пушењето не е забрането.
Во својата објава таа напиша дека на соговорничката ѝ рекла дека плажата е доволно голема и дека може да се премести доколку чадот ѝ пречи. Додаде и дека не сакала да се расправа, иако, како што наведува, добила навредливи зборови. Во објавата напиша и дека оние на кои им пречи чадот можат да одат на одмор во Грција или Албанија.
Нејзината објава беше споделена на страницата „Подгорички времеплов“, по што следуваа бројни коментари и спротивставени ставови.
Дел од корисниците застанаа на страната на жената на која ѝ пречел чадот, истакнувајќи дека луѓето доаѓаат на море за да уживаат во чист воздух, а не во чад од цигари.
Други, пак, сметаат дека, бидејќи пушењето на таа плажа е дозволено, секој што му пречи чадот можел едноставно да се премести, наместо да влегува во расправија.
Случајот повторно отвори дебата за тоа каде завршува правото на личен избор, а каде започнува обврската за почитување на другите посетители на јавните плажи.
