„Црна Гора затвори уште три поглавја, Албанија едно, каде е Македонија?“, велат од СДСМ

СДСМ преку соопштение ја обвини Владата предводена од Христијан Мицкоски дека ја изолира Македонија и го забавува нејзиниот европски пат, посочувајќи дека Црна Гора и Албанија продолжуваат со напредокот во преговорите за членство во Европската Унија.

— реклама —

Од партијата наведуваат дека Црна Гора затворила уште три преговарачки поглавја, со што вкупниот број достигнал 21 од вкупно 33, додека Албанија затворила едно поглавје. Според СДСМ, Црна Гора има цел да ги заврши преговорите оваа година и да стане членка на Унијата во 2028 година.

„Бевме во иста група. Денес сме со Косово и Србија“, наведуваат од СДСМ, правејќи споредба со напредокот на другите земји од регионот.

— реклама —

Опозициската партија тврди дека застојот во реформите е поврзан со неподготвеноста на власта да се соочи со барањата за владеење на правото и одговорност за корупцијата. Во реакцијата се споменуваат и потребата од соработка со Европското јавно обвинителство, како и прашањата за европските фондови, јавните набавки и случајот со петте тони дрога што, според партијата, поминале преку границата.

— реклама —

СДСМ ја критикува и политиката на Владата кон европските интеграции, обвинувајќи ја дека наместо да се посвети на реформите во правосудството и институциите, отвора други теми и го одвлекува вниманието од клучните проблеми.

Од партијата сметаат дека членството во ЕУ подразбира почитување на правилата, независни институции, еднаквост пред законот и слобода на медиумите. Според нив, застојот во овие области ја оддалечува Македонија од европските перспективи.

СДСМ порачува дека Македонија заслужува европска иднина и најавува дека ќе продолжи да бара одговорност од власта за состојбите во државата.