Тензиите меѓу Белград и Подгорица повторно се заострија, откако српскиот вицепремиер и министер за внатрешни работи Ивица Дачиќ остро реагираше на соопштението на Министерството за надворешни работи на Црна Гора, оценувајќи го како „врв на лицемерие и навреда за Србија“.
„Ваквите изјави се многу ретки во меѓународните односи и обично се даваат кога односите меѓу две земји се во сериозна криза, речиси на работ на војна. Дури и изјавите на Трамп против Иран се поблаги од соопштението на црногорското Министерство за надворешни работи“, изјави Дачиќ, реагирајќи на обвинувањата упатени кон српскиот претседател Александар Вучиќ и државата Србија.
Тој нагласи дека Србија нема поголем пријател од Црна Гора и потсети дека голем број Срби живеат во оваа држава, како и дека стотици илјади граѓани со црногорско потекло живеат во Србија, без да се соочуваат со какви било проблеми.
„Што направи Србија за да го заслужи ова? Кој има интерес од непријателство меѓу Србија и Црна Гора? Српскиот и црногорскиот народ сигурно не“, рече Дачиќ, додавајќи дека со децении постои непријателски наратив кон Србија во дел од црногорската јавност.
Тој се осврна и на историските прашања што се отвораат во односите меѓу двете земји, споменувајќи ја 1918 година и односот на Црна Гора кон Косово.
Претходно, Министерството за надворешни работи на Црна Гора ги отфрли како неосновани обвинувањата на српскиот претседател Александар Вучиќ дека Подгорица води „хибридна војна“ против Србија и ги загрозува нејзините интереси.
Во соопштението, црногорското МНР оцени дека зачестените пораки од Белград доаѓаат во период кога Црна Гора се приближува кон својата стратешка цел – членство во Европската Унија и во пресрет на изборните процеси во земјата.
„Очигледно е дека некои политички структури не можат да го прифатат фактот дека се опкружени со суверени, меѓународно признати и рамноправни држави“, наведоа од црногорското Министерство за надворешни работи.
Новата размена на остри пораки претставува уште едно поглавје во сложените односи меѓу Белград и Подгорица, кои во изминатите години повеќепати беа оптоварени со политички и историски несогласувања.
