Со доаѓањето на летото и високите температури, електролитските напитоци повторно станаа хит на социјалните мрежи. Инфлуенсери, спортисти и промотори на здрав живот тврдат дека тие ја подобруваат хидратацијата, ја зголемуваат енергијата и го забрзуваат закрепнувањето на организмот. Но, експертите предупредуваат дека за повеќето луѓе тие не се неопходни.
Електролитите се минерали како натриум, калиум, калциум и магнезиум, кои имаат важна улога во регулирањето на течностите во организмот, работата на мускулите и нервите, како и во одржувањето на енергетскиот баланс. Тие природно се наоѓаат во многу производи, меѓу кои банани, млеко, јогурт, зелен лиснат зеленчук и кокосова вода.
Иако при потење телото губи вода и минерали, нутриционистката Кери Торенс истакнува дека кај повеќето луѓе нема потреба од дополнителни електролитски суплементи.
„Бубрезите природно ја одржуваат рамнотежата на електролитите, а потребните минерали најчесто ги внесуваме преку разновидна исхрана богата со овошје, зеленчук, млечни производи, јаткасти плодови и немасно месо“, објаснува таа.
Сличен став има и професорот по физиологија Греам Клоуз, кој посочува дека за луѓето што вежбаат помалку од еден час, обичната вода е сосема доволна.
Електролитските напитоци можат да бидат корисни само при долготрајни и интензивни физички активности, особено кога се губат големи количини сол преку потење.
Експертите советуваат граѓаните да бидат внимателни со здравствените совети што циркулираат на социјалните мрежи, бидејќи многу инфлуенсери ги промовираат овие производи како платени реклами, без да имаат медицинска или нутриционистичка стручност.
Наместо да се потпираат на интернет-трендови, препорачуваат здравствените информации да се бараат од лекари, нутриционисти и научно потврдени извори.
