Најдобриот македонски таеквондист, Дејан Георгиевски, го освои златното одличје на меѓународниот турнир „Скопје Опен Г1“, кој се одржа во Спортскиот центар „Борис Трајковски“. Пред домашната публика, Георгиевски покажа врвна форма и доминација во својата категорија.
На патот до златото, македонскиот шампион оствари четири убедливи победи: во првото коло го совлада Абдула Ал Магди од Австрија, во второто коло го победи актуелниот европски шампион Иван Шапина од Хрватска, во полуфиналето го совлада освојувачот на светска бронза Пашко Вожиќ од Хрватска, а во финалниот дуел доминантно славеше против Илиа Рудерман од Израел.
Со овој триумф, Георгиевски обезбеди значајни бодови за светската ранг-листа, кои се клучни за обезбедување олимписка норма. Турнирот „Скопје Опен Г1“ годинава привлече над 1.000 натпреварувачи од 41 држава, што го прави еден од најмасовните спортски настани во земјата.
Успехот на Георгиевски е потврда за континуираниот раст на македонското таеквондо и потенцијалот за нови медали на најголемите светски натпреварувања.
