Македонската таеквондистка Ведрана Тунески освои сребрен медал на престижниот Гран-при турнир во Софија, еден од најсилните меѓународни турнири во олимписко таеквондо.
Репрезентативката на Македонија и членка на Таеквондо клуб Бутел до одличјето во категоријата кадетки до 51 килограм стигна со три убедливи победи против натпреварувачки од Грција, Хрватска и Кипар.
На стартот Тунески со 2:0 ја совлада Георгија Фрагиодаки од Грција, а потоа со ист резултат беше подобра и од Ема Бикиќ од Хрватска.
Во полуфиналето, македонската надеж приреди уште поголемо изненадување совладувајќи ја прворангираната Елеана Антониу од Кипар и обезбедувајќи место во финалето.
Во борбата за златниот медал, Тунески загуби со 0:2 од бугарската натпреварувачка Викторија Кулишева и го освои среброто.
Со овој резултат Ведрана Тунески обезбеди директен пласман на финалниот Гран-при турнир што ќе се одржи во декември 2026 година.
Тунески веќе подолг период се наметнува како една од најперспективните македонски спортистки во олимписките спортови, а овој резултат дополнително ја потврдува нејзината позиција меѓу најдобрите во светот во нејзината возрасна категорија.
