Деко не ја давал лиценцата на увид, а улицата пред дискотеката била блокирана од паркирани возила, сведочеше инспекторка на судењето за „Пулс“

Детали од полициските контроли во кабарето „Пулс“ во Кочани во 2022 и 2023 година беа изнесени на денешното судење против деветтемина полициски службеници обвинети во врска со пожарот во објектот. Самостојната инспекторка при Регионалниот центар за гранични работи Исток – Делчево, Деспина Симеонова, сведочеше дека при една од контролите сопственикот Дејан Јованов не ја дал на увид лиценцата за работа, додека пристапот до објектот бил отежнат поради паркираните возила.

Симеонова во МВР е вработена од 2001 година, а во текот на 2022 и 2023 година работела како инспекторка за странци, при што извршувала и канцелариски и теренски задачи.

— реклама —

Таа објасни дека инспекторите за странци самостојно постапуваат кога контролите се вршат според Законот за странци, додека при оперативни планови на МВР-БЈБ се организираат заеднички акции со други служби, меѓу кои МВР, Пазарната инспекција, Труд и социјала и други надлежни инспектори.

Во Кочани контролите најчесто биле насочени кон угостителски објекти, хотели, мотели, ноќевалишта и апартмани, со цел да се утврди евентуален нерегуларен или незаконит престој на странски државјани.

— реклама —

Според нејзиното сведочење, во „Пулс“ биле извршени повеќе контроли во периодот од 2022 до 2023 година. По секоја контрола бил составуван извештај и доставуван до Регионалниот центар за гранични работи Исток. Контролите се одвивале во ноќните часови, најпрво од 22 до 03 часот, а подоцна од 23 до 04 часот.

Говорејќи за состојбата околу објектот, Симеонова рече дека пристапот бил сериозно отежнат поради бројот на паркирани возила.

„Хаос е, со еден збор – не се поминува. Паркингот којшто се користи од хотелот во близина е преполн, а на улицата пред дискотеката не може да се помине од паркирани возила“, рече таа.

— реклама —

На една од контролите била побарана и лиценцата за работа на кабарето. Симеонова посочи дека документот бил побаран од колегата Златко Кузмановски, кој бил одговорен за акцискиот план, но сопственикот Јованов не ја покажал лиценцата ниту ја дал на увид.

Како што наведе инспекторката, Јованов објаснил дека е доцна да го побара книговодителот, бидејќи не бил во објектот, и дека лиценцата ќе ја донесе во понеделник. Тој, според сведочењето, тврдел и дека 15 дена претходно ги поднел документите за обновување на лиценцата во Скопје и дека во тој момент документот важел до 31 март 2023 година.

Симеонова посочи дека информациите за лиценцата и утврдената состојба биле внесени во извештајот од контролата.

Судскиот процес продолжува со сослушување сведоци и изведување на материјалните докази предложени од Обвинителството.