Деко нуди имот од 200.000 евра како гаранција дека нема да избега

Одбраната на Дејан Јованов – Деко, сопственикот на дискотеката „Пулс“ и првообвинет во судскиот процес, понуди гаранција од 200.000 евра за тој да излезе од притвор. Предлогот бил поднесен на 18 септември до Кривичниот совет при Основниот кривичен суд Скопје, а одлуката се очекува во текот на неделава.

Неговата адвокатка Ивана Коцевска за “Скопје1” вели дека притворот на Јованов истекува на 3 октомври и дека понудената гаранција треба да обезбеди сигурност за судот и за јавноста дека тој ќе биде достапен во текот на целата постапка.

— реклама —

„Имајќи предвид дека притворот на Дејан Јованов истекува на 3 октомври, одбраната, како што најави, со цел да даде поголема сигурност за јавноста и за судот дека обвинетиот ќе биде достапен во целиот понатамошен тек на постапката, на 18 септември поднесе предлог за определување гаранција во износ од 200.000 евра до Кривичниот совет при Основниот кривичен суд Скопје. Одлуката се очекува оваа недела“, изјави Коцевска за “Скопје1”.

Според неа, предложената гаранција го опфаќа целокупниот имот на обвинетиот и, во комбинација со мерки на претпазливост, е доволна за да се обезбеди неговото присуство до завршувањето на судскиот процес.

— реклама —

„Обезбедувањето на присуството на обвинетите во кривичната постапка не смее да се злоупотребува и да се користи како казна, особено кога мерката притвор истекува по сила на законот. Промената на мерката со предложената гаранција, која го опфаќа целокупниот имот на обвинетиот, во комбинација со мерки на претпазливост, е повеќе од доволна за да го обезбеди непреченото присуство на Дејан до завршувањето на судскиот процес“, вели Коцевска.

— реклама —

Одбраната очекува судот да го прифати предлогот, посочувајќи дека гаранција претходно била прифатена за поголем дел од обвинетите во истиот предмет.

„Сметаме дека судот подеднакво ќе го третира и првообвинетиот и ќе му ги почитува правата на правична постапка и правично судење, како на сите, така и на Дејан“, изјави Коцевска.

Таа додава дека очекува одлука без притисок.

“Дополнително очекуваме и веруваме дека одлуката ќе биде донесена од страна на судот без притисок од јавноста, со примена на исти процесни стандарди како и за другите обвинети”, додава таа.