Демократите ја преземаат контролата врз двата дома на Конгресот, Трамп најави блокирање на нивните одлуки

Изборните резултати во САД донесоа промена на односот на силите во американскиот Конгрес, откако демократите, според прелиминарните податоци, освоија мнозинство и во Претставничкиот дом и во Сенатот. Новиот состав ќе ја преземе функцијата во јануари, кога демократите ќе добијат контрола врз двата дома на законодавниот орган.

— реклама —

По изборниот успех, демократите најавија дека ќе го засилат надзорот врз извршната власт и дека би можеле да покренат истраги за работата на претседателот Доналд Трамп, членовите на неговото семејство и неговата администрација.

Сепак, Трамп и понатаму ќе располага со правото на вето врз законите усвоени од Конгресот, а претходно најави дека ќе го искористи доколку демократите победат на изборите.

— реклама —

По објавувањето на прелиминарните резултати, американскиот претседател објави фотографија од качкет со натпис „Вето“, кој наликува на препознатливите качкети со слоганот „MAGA“.

— реклама —

Хаким Џефрис, лидерот на демократите во Претставничкиот дом, би можел да стане првиот Афроамериканец на функцијата претседавач со овој дом. За тоа ќе треба да обезбеди мнозинство гласови при изборот, откако новиот состав на Конгресот ќе се состане во јануари.

„Започнува големото американско враќање“, изјави Џефрис, кој порача дека демократите ја вратиле контролата врз Конгресот на САД. Тој додаде дека американските граѓани покажале оти им е доста од екстремизам и корупција, пренесе Си-Ен-Ен.

— реклама —

За време на изборната ноќ, Трамп изјави дека е подготвен да соработува со демократите, но истовремено порача дека ќе стави вето на нивните одлуки.