Група американски сојузни држави предводени од демократите поднесоа тужба против администрацијата на претседателот Доналд Трамп, барајќи да се блокира одлуката со која имиграциските власти би добиле пристап до личните податоци на семејства што користат програми за парична помош.
Тужбата е поднесена до федералниот суд во Вашингтон и се однесува на одлуката што во јуни ја донесе Управата за деца и семејства при Министерството за здравство на САД. Со неа се дозволува споделување на податоците за корисниците на програмата за привремена помош на загрозени семејства (TANF) со други федерални институции.
Тужителите тврдат дека проверката на условите за користење на оваа помош е надлежност на сојузните држави, а не на федералната влада. Според нив, новата политика би овозможила податоците да се споделуваат и со Министерството за внатрешна безбедност за проверка на имиграцискиот статус на корисниците.
Од Калифорнија ја обвинија администрацијата дека ја злоупотребува програмата наменета за помош на сиромашните семејства за спроведување масовен надзор, додека државната обвинителка на Њујорк, Летиција Џејмс, оцени дека наместо да им помага на семејствата, администрацијата ги претвора програмите за борба против сиромаштијата во средство против најранливите граѓани.
Од Управата за деца и семејства засега не ја коментираа тужбата, но претходно соопштија дека мерката е неопходна за да се обезбеди проверка на државјанството или имиграцискиот статус пред исплатата на финансиската помош. Новите правила треба да стапат во сила на 11 август.
