Летувањето на најпознатите плажи во Италија станува сè поскапо, а на некои од најатрактивните дестинации еднодневен престој на четиричлено семејство може да достигне и до 1.500 евра.
Според податоците на италијанските здруженија за заштита на потрошувачите, цените на плажите летово се повисоки за околу шест проценти во споредба со минатата година.
Најскапи остануваат туристичките места на Амалфискиот брег, како Соренто, Капри, Амалфи и Позитано. Додека на некои плажи чадор за сонце може да се изнајми за околу шест евра, на полуостровот Соренто цената достигнува и до 350 евра.
Покрај лежалките и чадорите, поскапеле и паркингот, горивото, јавниот превоз, како и храната и пијалаците на плажите. Сендвичите, сладоледот, кафето и освежителните пијалаци во просек се поскапи за повеќе од пет проценти во однос на минатата година.
Најголем товар чувствуваат семејствата. Во одредени летувалишта пакет со чадори и лежалки за четири лица чини неколку стотици евра, а кога ќе се додадат трошоците за превоз, паркинг и ручек, сметката на најлуксузните дестинации лесно надминува 1.500 евра за само еден ден.
И покрај високите цени, Италија и понатаму привлекува милиони туристи благодарение на своите познати плажи и кристално чистото море. Сепак, експертите предупредуваат дека поради инфлацијата, повисоките трошоци за енергија и одржување, летувањето на најпопуларните италијански плажи станува привилегија што сè помалку луѓе можат да си ја дозволат.
