Денес Владимир Блажев – Панчо ќе го прославеше својот 47. роденден. Наместо роденденска прослава, честитки и насмевки, денот е исполнет со сеќавања на музичарот кој остави длабока трага на македонската музичка сцена.
Меѓу првите што му оддаде почит беше неговиот долгогодишен пријател, поранешниот кошаркар Перо Антиќ, кој со кратка, но емотивна порака се потсети на Панчо.
„Фалиш, џеџуле“, напиша Антиќ, со кого Панчо го делеше истиот роденден.
Панчо беше музичар, диџеј и еден од основачите на популарното поп-хип-хоп дуо ДНК, кое во 2001 година го формираше заедно со Андреја Ѓорѓиески. Во повеќе од две децении работа создадоа песни што станаа препознатлив дел од македонската музичка сцена. Покрај тоа, беше познат и како радио и клупски диџеј под уметничкото име DJ Shorty P.
Македонија се прости од Панчо на 14 октомври 2025 година, кога им подлегна на тешките повреди здобиени во трагичниот пожар во дискотеката „Пулс“ во Кочани. Неговата смрт остави голема празнина кај семејството, пријателите, колегите и илјадниците обожаватели.
По трагедијата, тој се лекуваше во болницата „Аџибадем Систина“, каде што му беа извршени повеќе оперативни зафати. Во еден период неговата состојба покажуваше подобрување, но подоцна нагло се влоши. И покрај напорите на лекарските тимови, ја загуби најтешката животна битка.
Пријателството меѓу Панчо и Перо Антиќ продолжи да живее и по неговата смрт. Антиќ остана силна поддршка на неговото семејство, а еден од најтрогателните моменти беше кога го однесе синот на Панчо на неговата полуматурска прослава, исполнувајќи го ветувањето дека ќе биде покрај семејството на својот пријател.
