Денеска православните верници го одбележуваат споменот на Светите маченички Вера, Надеж и Љубов и нивната мајка Софија, кои со векови уживаат голема почит меѓу христијаните.
Според христијанското предание, Софија била Римјанка, која своите три ќерки ги воспитувала во христијанската вера, учејќи ги на вера, надеж и љубов кон Бога и кон ближните. Токму по овие добродетели биле именувани и нејзините ќерки.
Вера имала 12 години, Надеж 10, а Љубов само 8 години кога, според преданието, биле изведени пред римскиот цар Адријан поради нивната христијанска вера.
Трите сестри биле подложени на тешки мачења, а потоа биле погубени една по една. И покрај страдањата, според преданието, тие не се откажале од својата вера.
По смртта на своите ќерки, Софија останала на нивниот гроб три дена, молејќи се Бог да ѝ подари смрт и да ја соедини со нив. Преданието вели дека по третиот ден и таа починала и била погребана покрај своите деца.
Празникот во народната традиција особено се поврзува со мајките и нивните ќерки. Во некои средини постои обичај на овој ден девојчињата да се израдуваат со подарок, без оглед на неговата вредност, како знак на љубов, внимание и почит.
Во македонската традиција особено е познато и заколнувањето во „вера, надеж и љубов“, зборови што се поврзуваат со трите свети маченички.
