На празникот Рождество на Пресвета Богородица, во манастирот „Пречиста“ кај Кичево, сестра Зора го прими монашкиот потстриг и новото монашко име Хрисанта.
Монашкиот потстриг го изврши митрополитот Дебарско-кичевски г. Георгиј, а сестра Хрисанта ги положи монашките завети на послушност, смирение и целомудрие.
„Станувајќи нова монашка рожба на овој славен ден на Богородичното рождество, таа прими монашки потстриг од рацете на нашиот почитуван митрополит Дебарско-кичевски г. Георгиј, украсувајќи се со новото име Хрисанта“, објавија од Бигорскиот манастир „Свети Јован Крстител“.
Оттаму наведуваат дека сестра Хрисанта била духовно подготвувана под раководство на епископот Антаниски г. Партениј и дека нејзиното замонашување претставува посебна радост за сестринството во манастирот.
„Оваа новонасадена фиданка, грижливо одгледана од нашиот Старец, ги положи древните и свети монашки завети на послушност, смирение, целомудрие и целосно распнување за светот“, се додава во објавата.
Од Бигорскиот манастир ѝ посакаа на сестра Хрисанта истрајност во монашкиот живот и непрестајна молитва пред чудотворниот образ на Пресвета Богородица.
