Во близина на Инѓија е пронајдено тело во буре, а српските медиуми јавуваат дека постои сомнеж оти станува збор за Александар Нешовиќ Баја, кој исчезна пред девет дена по пукање во ресторан во Белград.
Според неофицијални информации, во бурето биле пронајдени траги што укажуваат дека некој се обидел да го запали телото. Идентитетот на починатото лице ќе се утврдува со обдукција и ДНК-анализа.
Потрагата по Нешовиќ траела девет дена, а во акцијата учествувале припадници на полицијата, жандармеријата и единици на српската армија. Пребарувањата биле насочени кон подрачјето околу Јарковачкото Езеро, недалеку од Инѓија.
Српското Вишо јавно обвинителство соопшти дека телото било откопано во присуство на обвинители, полиција и форензичари. Според досегашните сознанија, Нешовиќ бил убиен „на подмолен начин“ на 12 мај, а неговото исчезнување било пријавено следниот ден.
Во врска со случајот се уапсени 10 лица, меѓу кои и поранешниот началник на белградската полиција Веселин Милиќ, кому му е одреден 30-дневен притвор. Тој е осомничен дека сторил повеќе кривични дела со цел прикривање на обидот за убиство и попречување на истрагата.
Според истрагата, за пукањето во ресторанот на белградски Сенјак е осомничен Саша Вуковиќ Боске, кој наводно пукал во Нешовиќ пред полициски службеници, по што телото било однесено на непозната локација.
Случајот предизвика силни реакции во Србија, а претседателот Александар Вучиќ го оцени како „исклучително тежок случај“ за државата и најави санкции за полициски и воени функционери кои соработуваат со криминални групи.
