Детската клиника во Скопје се соочува со недостиг од медицински сестри, поради што привремено се споени два оддела, информираше денеска директорот на установата, Реџеп Мемеди.
Одговарајќи на новинарски прашања, Мемеди истакна дека сите оддели имаат голема фреквенција на пациенти од целата држава, поради што било неопходно да се преземат организациски мерки.
„Бидејќи не можевме со главната сестра никако да организираме сменска работа и распоред за дежурства, бевме приморани привремено да направиме фузија на двата оддела за да можеме да имаме на располагање сестри кои ќе покриваат дежурства. Станува збор за Имунологија и Пулмологија А. Одделот не е укинат, туку ова е привремено решение за да го пребродиме периодот кога немаме доволен број кадар“, изјави Мемеди.
Тој нагласи дека, и покрај намалениот капацитет за прием, ниту едно дете не се враќа без да биде згрижено.
„Ќе најдеме место, ги згрижуваме и ги третираме сите пациенти. Но, поради недостатокот од медицински сестри, двата оддела ги спојуваме за да обезбедиме доволен број вработени кои ќе можеме да ги организираме за дежурства“, додаде директорот на Детската клиника.
