Девет лица се уапсени во општина Зубин Поток под сомнение дека извршиле воени злосторства, објави приштинската телевизија „Клан Косова“.
Апсењата се дел од полициска операција спроведена рано утрово под кодното име „Досие 23“, по наредба на Специјалното обвинителство на Косово. Во акцијата учествувале Дирекцијата за истрага на воени злосторства и други специјализирани полициски единици.
Според обвинителскиот систем, операцијата е поврзана со случајот познат како „Група интелектуалци“. Специјалното обвинителство и косовската полиција најавија дека дополнително ќе ја информираат јавноста за деталите од операцијата и преземените дејствија.
Случајот се поврзува со ископувањата што кон крајот на јуни и почетокот на август беа извршени во близина на селата Мала Калудра и Јабука во општина Зубин Поток. Тогаш биле пронајдени останки на 23 лица, за кои се поврзува дека биле дел од таканаречената „Група интелектуалци“.
ДНК-анализата на три од пронајдените останки, извршена во Хаг, потврдила дека станува збор за членови на „Групата интелектуалци“ кои исчезнале на 19 април 1999 година.
