Дијамантите би можеле да ги забрзаат компјутерите, Кина гледа милионска заработка

Кинеските производители на синтетички дијаманти бараат нови пазари бидејќи нивните приходи опаѓаат поради падот на цените на дијамантите за накит.

Можноста ја гледаат во компјутерските чипови, особено во материјалите што би можеле да овозможат нивно поефикасно ладење, пишува „Ројтерс“.

Кина произведува приближно половина од сите синтетички дијаманти во светот, а дури 80 отсто од кинеското производство доаѓа од провинцијата Хенан. Сепак, големото производство и сè посилната конкуренција ги намалија цените на дијамантите за накит, поради што производителите бараат нови извори на приходи.

Фенг Цанџун во својата фабрика „Џјаруифу“ има 550 машини, од кои секоја чини околу три милиони јуани и тежи повеќе од 100 тони. Благодарение на оваа опрема, од почетокот на работењето во 2019 година, тој го зголемил годишното производство десеткратно, достигнувајќи два милиони карати во 2025 година.

— реклама —

Во моментов, околу 70 отсто од неговото производство е наменето за изработка на накит, но до 2030 година планира повеќе од половина од производството да го пренасочи кон индустриски дијаманти.

Една од причините е и поголемата заработка. Според Фенг, бруто-профитната маржа кај дијамантите за накит изнесува меѓу 30 и 40 отсто, додека кај индустриските дијаманти достигнува околу 50 отсто.

Благодарение на своите својства, синтетичките дијаманти би можеле да имаат важна улога во производството на полупроводници, ладењето на компјутерските чипови и квантната технологија.

Тие веќе се користат за исклучително прецизно полирање полупроводници, обработка на тврди метали и керамика во квантните уреди, како и за одведување на топлината во напредните електронски системи.

— реклама —

Кинеските медиуми објавија дека компаниите „Хуавеи“ (Huawei) и TSMC ги истражуваат можностите за нивна примена во ладењето на чиповите, додека „Леново“ (Lenovo) веќе претстави преносен компјутер со материјал за ладење изработен од дијамант и бакар.

Во април, кинески истражувачи објавија дека ваквите модули за ладење го подобриле преносот на топлина од чиповите за 80 отсто, додека нивните перформанси се зголемиле за 10 отсто.

Аналитичарите сметаат дека токму способноста на дијамантите ефикасно да ја одведуваат топлината претставува една од најголемите краткорочни можности за нивна индустриска примена. Причината е забрзаниот развој на вештачката интелигенција, кој ја зголемува потребата од поефикасно ладење на компјутерските системи.

— реклама —

Дијамантските материјали за одведување топлина би можеле да конкурираат на некои од материјалите што се користат денес, под услов производителите да почнат да ги вградуваат во центрите за обработка на податоци и во чиповите за вештачка интелигенција, наведува „Ројтерс“.

Меѓународната агенција за енергија (ИЕА) проценува дека центрите за обработка на податоци до крајот на деценијата ќе трошат околу 945 терават-часови електрична енергија годишно. Тоа е повеќе од двојно во споредба со денешната потрошувачка и приближно одговара на годишната потрошувачка на електрична енергија во Јапонија.

Интересот за индустриските дијаманти расте и надвор од Кина. Американската компанија „Интел“ (Intel) инвестира во развојот на дијамантски подлоги за производство на чипови, додека компанијата „Елемент Сикс“ (Element Six), дел од британската групација „Де Бирс“ (De Beers), и јапонската компанија „Орбреј“ (Orbray) работат на нивно производство во САД за потребите на електронската индустрија.

„Ројтерс“ кон крајот на јануари објави дека изградбата на фабрика за синтетички дијаманти во САД би можела да биде дел од јапонскиот инвестициски пакет.

Во проектот учествува компанијата „Елемент Сикс“, а целта е зголемување на американското производство и воспоставување американско-јапонски синџир на снабдување што нема да зависи од Кина, наведуваат извори запознаени со плановите.

Јапонија, во рамките на трговскиот договор со САД, подготвувала инвестициски пакет што би опфатил сопственички вложувања, кредити и кредитни гаранции.

Инвестициите во производството на синтетички дијаманти се дел од пошироките напори на Вашингтон и Токио да обезбедат пристап до материјали важни за производството на чипови и високопрецизната индустрија.

И Шпанија најави инвестиција од 753 милиони евра во фабрика на компанијата „Дајмонд Фаундри“ (Diamond Foundry), во која ќе се произведуваат дијамантски плочки за примена во чипови, наведува „Ројтерс“.