Од накит до вештачка интелигенција: дијамантите стануваат важни за ладење на чиповите

Падот на цените на дијамантите за накит ги принудува кинеските производители да бараат нови извори на приходи, а една од најперспективните можности ја гледаат во производството на компјутерски чипови и нивното поефикасно ладење.

— реклама —

Кина произведува околу половина од синтетичките дијаманти во светот, а 80 отсто од домашното производство доаѓа од покраината Хенан. Сепак, големото производство и засилената конкуренција ги намалуваат цените, поради што компаниите сè повеќе се насочуваат кон индустриската примена на дијамантите.

Производителот Фенг Цанџун, сопственик на фабриката „Џјаруифу“, располага со 550 машини, а годишното производство од почетокот на работењето во 2019 година го зголемил десеткратно. Во 2025 година достигнало два милиона карати. Иако околу 70 отсто од производството сè уште е наменето за накит, до 2030 година планира повеќе од половината да ја пренасочи кон индустриски дијаманти, каде што бруто-профитната маржа достигнува околу 50 отсто, наспроти 30 до 40 отсто кај дијамантите за накит.

— реклама —

Синтетичките дијаманти имаат својства што ги прават погодни за производство на полупроводници, ладење на компјутерски чипови и квантна технологија. Кинеските медиуми објавија дека „Хуавеј“ и „ТСМЦ“ ја истражуваат нивната примена за ладење на чиповите, додека „Леново“ веќе претставил преносен компјутер со материјал за ладење изработен од дијамант и бакар. Според кинески истражувачи, ваквите модули го подобриле преносот на топлина од чиповите за 80 отсто, а нивните перформанси за 10 отсто.

— реклама —

Развојот на вештачката интелигенција дополнително ја зголемува потребата од поефикасно ладење на компјутерските системи. Меѓународната агенција за енергија проценува дека до крајот на деценијата центрите за податоци ќе трошат околу 945 терават-часови електрична енергија годишно, повеќе од двојно во споредба со денешната потрошувачка.

Интересот за индустриските дијаманти расте и надвор од Кина. Американскиот „Интел“ вложува во развој на дијамантски подлоги за чипови, додека британската група „Де Бирс“, преку својата компанија „Елемент Сикс“, и јапонската „Орбреј“ работат на нивно производство во САД. Шпанија, пак, најави инвестиција од 753 милиони евра во фабрика на компанијата „Дајмонд Фаундри“, која ќе произведува дијамантски плочки за примена во чипови.

Овие вложувања се дел од пошироките напори на САД и Јапонија да обезбедат сопствени извори на материјали важни за индустријата за чипови и да ја намалат зависноста од кинеското производство.