Димче Арсовски седнува во директорската фотелја на МКЦ, Бени Шаќири поднесе оставка

Младинскиот културен центар (МКЦ) во Скопје доби нов директор. На раководната позиција во една од најзначајните културни институции во главниот град е назначен Димче Арсовски, познат во јавноста како поранешен портпарол на ВМРО-ДПМНЕ.

— реклама —

Арсовски доаѓа на местото на досегашниот директор Бени Шаќири, кој поднесе неотповиклива оставка од лични причини. Иако се повлекува од раководната функција во МКЦ, Шаќири останува ангажиран во културниот сектор, но овојпат како советник за култура во кабинетот на градоначалникот на Скопје, Орце Ѓорѓиевски.

Информацијата за кадровската промена ја соопшти самиот Шаќири преку објава на својот фејсбук-профил, во која ги образложи причините за повлекувањето и го најави својот нов професионален ангажман.

— реклама —

„Поднесов неотповиклива оставка до градоначалникот на Град Скопје, Орце Ѓорѓиевски, од лични причини. На предлог на градоначалникот Ѓорѓиевски, останувам дел од неговиот кабинет, на позицијата советник за култура, со што ќе се обидам, од еден поинаков аспект, да придонесам за унапредување и развој на културата во градот“, напиша Шаќири.

— реклама —

Тој во објавата му посака успех на својот наследник, изразувајќи надеж дека новиот директор ќе успее да се справи со предизвиците со кои се соочува институцијата.

„Верувам дека како млад човек ќе даде максимум од себе, за да може да се справи со сите тешкотии со кои културата се соочува изминативе години“, додаде Шаќири.

— реклама —

Бени Шаќири беше назначен за директор на Младинскиот културен центар на почетокот на 2024 година, за време на мандатот на тогашната градоначалничка на Скопје, Данела Арсовска.