Динамо Загреб повторно ќе се обиде да го врати Лука Модриќ во клубот.
Италијанскиот новинар Пјетро Балцано Прота во емисијата „Милан експрес“ објави дека „модрите“ повторно стапиле во контакт со капитенот на Хрватска со цел да го вратат во татковината.
„Можам да потврдам дека Динамо контактираше со Модриќ. Планот на Лука е да помине уште една година во Милан под водство на Масимилијано Алегри, доколку клубот се пласира во Лигата на шампионите. Тој е воодушевен од Милан и организацијата во клубот“, изјавил Прота.
Ова не е првпат раководството на Динамо да се обиде да го врати својот поранешен капитен и фудбалер.
Клубот и претходно покажувал интерес за Модриќ, а последниот сериозен обид бил на почетокот на сезоната. Тогаш хрватскиот ветеран сепак се одлучил за трансфер на „Сан Сиро“.
Иако е во 40-та година од животот, Модриќ сезонава беше еден од клучните играчи на Милан во борбата за титулата во италијанската Серија А.
